香港教育城的TVNews行之已久，每星期提供數段明珠台的新聞及練習供學生一個英文學習平台，不過很多學生都對此平台十分抗拒。箇中原因，我嘗試分析一下：

1. 學生本身對學習英文就很抗拒
2. TVNews練習量過多，造成功課壓力
3. 老師硬性規定完成進度，帶強迫性而非鼓勵性，學生抗拒，只求交貨，不求學習
4. TVNew對低form來說有太多深字，需不斷查字才能理解內容，興趣下降
5. 同時硬吸太多生字，難以記憶和消化，學習成效不大
6. 題目設計多針對內容細微和無關重要的地方，對提升語文能力效果不大
7. 回答問題需要重複看片數次，費時和令人厭惡
8. 對新聞內容不感興趣，無法投入
9. 其他同學不做，有樣學樣

以上有幾點自己都有同感的，我覺得最大的問題係TVNews好難令人有心機做。做TVNew要首先有一定的英文水平，以前睇住條新聞片，見住一大堆生字，聽到不明所以。學生程度差咁遠，點會有心機做？猶如你叫個小學生讀一篇社論，根本讀唔明。二來大家都冇乜新聞觸覺，對住d看似事不關己的新聞又邊會上心？理解能力又大大下降了。

我以前都好抗拒，覺得又難做又要用好多時間，但現在做落，又覺得唔係好難，唔會睇完都唔知up乜，要花的時間相對少左。應該係因為平時多睇左新聞，黎到中六英文水平又高左，所以對呢d新聞的抗拒同不解少左。雖然d題目依然係費費地，但聽住d新聞都學到野既，難度低左後比較好投入。

現在又冇乜大壓力被迫交貨，自己得閒都做下一兩篇，感覺更輕鬆更有效率地學習，起碼係真真正正咁感覺到自己識多左野而唔係做完都唔知有乜得著，感覺到的唔係壓力的釋放而係一份滿足。雖然重係有d惰性，動力不足，做唔晒咁多，但點都比被強迫交貨而臨急抱彿腳各出奇謀過關要好。

有d野真係唔迫得的，不過要有辦法鼓勵同要令人懂得享受學習的過程，提起興趣。而且程度要較接近學生實際，咁先係最佳、最基本的動力。